Havreki avriggaður fyri veturin.

Lagt var yvir til havnaskrivstovuna, har segl og mastur vóru tikin niður,  eisini var skift til vetrarkalesju.

Eitt gott og hendingaríkt sigliár er at enda komið😀

Farið var í fjørðin, men einki var at fáa, so siglt var víðari til Nólsoy.  Veðrið var gott so yvirnátta var. 

Ein túrur gingin suður i Bergrætt, og tá komi var heimaftur vóru 2 veðrar sum tóku ímóti okkum - helst blivur teir flettir nakrar dagar seinri.

Á veg innaftur var kasta á Nesaleiðini og 11 fiskar fingnir.

Teir spontanu túrarnir eru ofta góðir.

Farið var á Summarfestival.  Siglt var á Leirvík, saman við Meranti og Sunbeam, har yvirnátta var.

Hósdagin var siglt víðari til Fuglafjarðar  og Fríggjadagin til Klaksvíkar.

Av Klaksvík var siglt sunnudagin  og beinleiðis til Havnar

Nú er Noregs túrurin at enda komin.  kl. 04.45 var lagt at í Vágsbotni, eftir neyvt 3 døgn í sjógvnum.

Loyst var úr Bergen týsmorgun kl. 05.45 og við tað, at norska klokkan er 1 tíma frammanfyri, vardi heimtúrurin neyvt 3 døgn (72 tímar).  Tó var steðgga 2 tímar í Ulsta í Hetlandi. 

Sum greitt er frá frammanfyri, hevur hetta verið ein góður og áhugaverdur túrur - sum sagtans kann viðmælast at gerða aftur, kanska Noreg, kanska onkra aðra staðni.

Av tølum fyri túrin kunnu nevnast:

Túrurin vardi          55       døgn
Skiftandi manning   7         pers tils 
Sigldir vóru            1.550   fj
Brúkt olja               653     ltr
Brúkt gass              1,5      11 kg fl (matgerð og hita)
Vitjaðar vóru          46       havnir
Goldið havnagjald   6.545  kr    (minst 50 mest 275)
Fiskaðir vóru           5        fiskar
Tikið krækling         2        ferðir
Gongutúrar í landi   45      km 
Kostnaður fyri túrin 40      tús  (fyri 2 pers við alla tíðina)

Jú, gott er við einum heitum kaffimunni, tá man skal á dekki 05.30 á morgni.

Sjálvt um veðrið hevði veri gott, var avgjørt at fara inn í Hetlandi, fyri at síggja veðurkort og eisini at bunkra olju, sjálvt um vit uttan iva høvdu klára heim við verðandi bunkring.

Eisini vísti tað seg, at vit onki vatn høvdu eftir, seinastu 6-8 tímarnar, tí ein krani á wc-inum hevði staði frá og tømt tangan.

Sum nevnt komu vit inn til Ulsta kl 16.00, men har var ikki serliga góð viðurskifti.  Olju fingu vit ikki á bryggjukantinum, men máttu berða olju í dunkum,  tí bleiv tað bara til 40 litrar, vit høvdu aðrar 40 í lastini.

Eisini var trupult at fáa vatn. Tað fingu vit frá krana hjá ferguni og mátti eisini berast umborð.  Vit høvdu ein 5 litur dunk og eina pøs sum vit bóru í, uml 100 ltr, so tað blivu nakrir túrar. Møttu einum manni sum bjóðaði sær at lána okkum ein 25 ltr dunk, sum hann skuldi fara heim eftir.  Hvussu langt, spurdu vit ?  Bara 40 km at koyra, var svari. Vit takkaðu fyri og hildu at vit kláraðu tað sum var.

Ein handil, var niðan frá bryggjuni, har fingu vit keypt onkur "smáting", sum vóru bíligari enn í Noreg.

Ein góður biti var etin umborð, og eftir at hugt eftir veðurkorti - sum boðaði frá góðveðrið komandi tveir dagarnar - var  eftir 2 tímar steðgg lagt frá landið, norð gjøgnum Yellsund og norður um Gruney við kós mót Føroyum

Meðan siglt verður hava vit gjørt av at ganga vakt, 2 tímar ísenn.  Tað hevur undirritaði ikki roynt áður, men tað kann fáa tankarnar at sveima - púra einsamallur í verini, við náttarmyrkri og mánalýsi.
 
"Tá á nátt eg einsamallur standi, stýri skútu . . . . . . . .."  Jú, jú, so hevur man roynt tað eisini.


Framhald úr loggbókini

05.30  Sólin rísur
06.30  Tokan gerðst tjúkk, missa Emblu úr eygsjón, tosað saman
08.30  Embla kallar, fyri at fáa okkara pos. - finnur okkum
10.45  Embla leggur suður mót Lerwick
14.30  Rundað fýrin á Out Skerries
15.15  Takað norska gestaflaggið niður og seta hetlendskt
16.00  Kom inn til Ulsta

Veðrið er gott so, tað er avslappandi sigling.  Segl er sett, men gerð ikki tann stóra munin.

Í góðveðrinum er ein góður biti á dekkinum ikki at forsmáa

Út loggbókini kann nevnast:

10.50  Mærsk Flensborg passerar framman stb
13.10  Bulk skip passerar aftan bb
14.00  Missa landkenning Noreg
18.00  Síggja fyrsta boripall
20.10  Ferðamannaskip passerar framman bb
22.00  Halda av fyri partrolarum úr Hetlandi

Kl  09.20  rundað vit "Marstein Fýr" og seta kós mót "Ulsta" Hetlandi.

Av tí at føðingardagur er umborð, verður gjørdur ein góður morgunmatur tá vit fara útum Marstin.  Egg, bacon v.m og eitthvørt gott niðurundir !

Kl  04.30 verður farið upp,  útpurrað umborð á Emblu, og í allarfagrasta veðri, verður  loyst kl.  05.45  og siglt út av Bergen. 

Siglt verður suður gjøgnum Byfjorden, Steinsundet, Raunefjorden og Korsfjørden  við kós norðanvert Marstein fýr. 

Avtalað er, at Havreki siglir fremri og Embla fylgir aftaná, teir hava radara og kunnu betur fylgja okkum.  Lurtað verður á kanal 16. 

Veðrið er avbera gott sog vit verða liggjandi í Bergen  og takað okkum av løttum

Ídag er veðrið munandi betur, stilt og nakað av sól.  Fara í tourist info at vita hvat túrar eru frá Bergen, tað er ikki tá stóra, burtursæð frá sigling, men tað er ikki júst tað vit hugsað um.

Avgjørt verður at fara niðan á Ulriksbanan og so ganga eftir fjøllunum “vida” yvir til Fløjen og takað hann omanaftur.  Hetta er ein túrur uppá 15-18 km.  Vit takað tað róligt og gerða onkran avstingara á vegnum, so tá vit koma aftur í bátin hava vit gingið  7-8 tímar tilsaman 21 km  í upptil 750 m hædd

Liggja í Bergen.  Veðrið er sera vánaligt, so vit avgerða at verða liggjandi, tí ikki er nógv at fara útaftur til, sum veðrið er.  Tosað við 2 av donsku siglarunum, sum geva seg til kenna, tá teir síggja vimpulin vit hava undir krosstrænum.  Vit hildu at teir fóru at sigla í felag inn í Bergen, men tá vit koma har liggja teir ymsastaðni, og ongin samling er á. Teir hava eisini broytt skránna, vegna veður.

Eftir at hava keypt nýtt gass – fyrstu ferð á túrinum – verður siglt víðari til  Storebø, men hendan havnin er ikki sum umtalað, so vit gerða okkum ein temunn og fara so víðari og royna eit lítið pláss sum eitur Haganes á Sotra, hóðast hetta ikki er umtalað í losinum.

Sær út til at verða sera hugnaligt, sigla inn mót pierinum, men her er vónleyst at leggja at.  Ein maður í jollu siglir uppá prei, og sigur at havnin er lítil og seglbátar sleppa ikki inn, men biður okkum fara runt um nesið og har góð havn er við facilitetum.

Tjúkt er í veðrinum, so vit yvast í at loysa, men avgerða kl 13.45 at fara víðari til Bekkjarvik,  møguliga inn í eitt pláss sum eitur Húsavík á vegnum.  Talan er um uml 20 fj sigling, og tá veðrið framvegis er tjúkt og regn, verður Húsavík slept og vit koma til Bekkjarvik kl 19.

Loysa uml kl 13, við kós móti Lervik, har vit koma kl 15.  Veðrið er meira so sum so, nakað av vindi og ilsligt, ikki so lætt at koma til bryggju, tá ongin bóskrúva er, men eftir 2. royndina eydnast og vit leggja uttaná Liv frá Ebeltoft, sum er ein av donsku bátunum ið luttekur í regattaðini “Sognefjorden”.

Havnin er góð og sera góðir facilitetir,  havnagjald 240/-  íroknað el, brúsu, vaskimask og turkitr, internet, rundstykkir og avís umborð um morgunin. Her liggja vit 2 dagar, og njóta at verða í frið !!!

Eftir eitt hugnaligt kvøld í Fjelsberg og veðrið var gott, var avgjørt at verða liggjandi, tí konsert skuldið verða kvøldið eftir, við einum “kendum” trubaduri  (á la Sámal Ravnsfjall), og vit høvdu onki at skunda okkum til.

Konsertin var góð, hann spældi nøkur góð løg, og fortaldi góðar søgur innímillum.  Hetta var við ávísari dialekt, vit skiltu ikki alt, men hugnaligur stemningur.

Komu í prát  við tvær tilkomnar norskar kvinnur, ætttaðar úr norðurnoreg og vóru “på hytta” – tær skiltu heldur ikki alt, so tað vóru ikki bara vit.  Løgði sum fólk fata tingini – práti fall á hvar vit vóru frá v.m.  Føroyar og Grønland hoyra til Danmark  ??   drekka tit líka illa sum Grønlendingar !?!?!?.    Spurdu eisini hvat vit liva av – Fiskarí, aling og nakað av landbúnaði  - og so stríðast vit við normenn um makrel !  Tá svaraði onnur, at hon át makrel 2 ferðir um árið, og so vildi hon ikki hoyra meir um makrel !!!

Fara víðari fyrrapartin og ætlað okkum til Fjelbergsund, men sigla tó norð- eysturum Halsnoy og leggja inn í Hillestadsvaagen, at vitja gamlar gøtur.  Har liggja vit einar 3 tímar áðrenn farið verður víðari.

Tá vit koma til Fjelbergsund, vísir tað seg at tað er í góða gamla Dalavik, har bátarnir liggja – og festivalur  ??? -    Eitt gott gamalt “bygdaball”

Einir 40 bátar lógu við gestabrúnna og borðreitt var í tjaldið á bryggjukantinum.  Á matarlepanum vóru ópilkaðar rækjur – so nógv etast kundi, við brey afturvið. Eisini fekst øl og vín, livandi tónleikur og dansur til kl 01.00

Loysa uml kl 11 við kós mót Eidsvik.  Á vegnum leggja vit inn á “Lykkesøyavaagen” sum er ein sera vøkur náttúruhavn og vit í sínari tíð ætlaðu at royna “ankargløsini” saman við Meranti, Sumbeam og Freju (tað er ein onnur søga) men her eru bátarnir sum “fluga á lorti” so vit fara víðari til Eidsvik.

Á veg omanaftur ganga vit gjøgnum skógin og koma fram á eitt gamalt “Sæter” sum er við at verða uppafturbygt. Her eru 2 smáttur (uml 5 kvm) lidnar og standa opnar, har fólk eru vælkomin inn – vit fara inn.  Í aðrari er brenniovnur, brenni, ketil og tebrøv v.m, borð við bonki. Stakar standa á borðinum so, vit tendrað ljós, seta okkum niður og skrivað eina heilsan í gestabókina.

Hin smáttan hevur timburgólv og lítla sofu við borði – eini 2-3 fólk kunnu sova har.

Tá Jegvan og Marjun eru farin, er rættuliga tómt umborð, so hvat nú.  Jú dagurin er ungur enn, so hvat við einum gongutúri.  Fara á tourist info og spyrja okkum fyri,  har hava tey fleiri møguleikar, og velja vit at ganga niðan á “Skaalastølo” og møguliga longur. 

Veðrið er av tí allarbesta stilt og bakandi sól, so vit ganga víðari og skjótt eru vit komin niðan um trævøksturin so útsýni er avbera gott.  Tað er júst sum í Føroyum, er man komin uppá á ein fjallatind, kann man blíva við, uttan at hugsað um hvussu langt man gongur.

Brúka dagin í Jondal, vitja millum annað kirkjuna, har Jegvan spælir eitt lag fyri okkum.  Vitja ein minnisvarða, sum vit halda er fyri tíðin tá Noreg hevur verið undir fremmandum valdið.  Eisini vitja vit tourist informatiónina, har vit keypa okkum ein kaffimunn, og spyrja um henda minnisvarða.  Tann fryntligi maðurin veit ikki rættuliga, meinar hann er frá  seinra heimsbardaga, men tað halda vit passar ikki.  Hann skal kannað, og kemur aftur hálvan tíma seinri við 4  tjúkkum bókum. So hann gjørdi nakað við málið – og vit høvdu rætt.

Uml kl 14 leggja vit aftur frá landi og ætlað suður til Sild, ein lítlan hólm tætt við Varaldsøy, sum ein normaður viðmæltið okkum, men vit fara inn í Jondal á vegnum.

Her er eisini góð havn, og vit hitta fólk frá bátafelagnum sum júst hava tikið nýtt felagshús í brúk.  Vit eru tey fyrstu sum skrivað í gestabókina, so tey fáa sjálvandi eitt bátafelags mjáfalgg, at heingja upp í hølunum.

Norheimsund er eitt sera hugnaligt og nosligt pláss, og hevur góða gestahavn, við øllum hentleikum. Eisini takað menn á bryggjuni væl í móti og vísa okkum á leyst pláss.

Fyrrapartin er veðrið av tí allarbesta, so vit loysa og seta kós longur inn í Hardangerfjørðin, ætlað møguliga til Gjermundshamn, men sigla framvið og enda uppi í Munnheim.  Her eta vit ein bita, men kunnu ikki verða liggjandi har.

Kl 13.30 sigla vit aftur til Uskedal, til “Alsong i sjøkanten” sum skal verða kl 15.   Hetta var hugnaligt tiltak, har lokalir harmonikuspælarar undirhildu og endaðu við at spæla nøkur dansiløg eisini, har fólk tóku ein swingom.  

Liggja í Uskedal fyri dagin, ganga túr gjøgnum bygdina og “minnast gamlar dagar”.  Um 5 tíðin loysa vit við kós mót Rosendal.  Veðrið er gott, lítið lot so vit seta segl og logga millum 2 og 5,5 míl.  Koma til Rosendal uml kl 19 og leggja í frískum vindi til eina flótibrúgv, men har er ikki gott at liggja, loysa aftur og leggja til træbrúgv, tætt við oljubryggjuna.  Har er betur.

Um døgverðatíð, verður flutt aftur til gestabrúnna at takað vatn, tó at her framvegis er óslætt. Síðan verður loyst og ætlanin er at fara til Uskedal. Á vegnum verður lagt inn í Nordtveitgrend, har frokostur verður etin.

Loysa fyrra partin og seta kós suðurum nesið og til Osoyra, hetta er eitt størri pláss.  Leggja til gestabrúnna, men ringt er at liggja har – streymur frá ósanum, og nakað av landsyningi geva aldu við brúnna.  Nakað seinri venda vit bátinum, men tað munar ikki.  Áðrenn vit leggja okkum fyri náttina veður flutt inn í vinnuhavnina, har er stilt.

Liggja í Hjellestad allan dagin.   Hjellestad er ikki tað sum tað var í 2006, tá  havnafútin kom  at takað mót endanum og segði hvar man skuldi liggja, eins og krúss vóru givin til “skipararnar”.   Nú var einki av hesum.

Marjun og Jegvan skulu koma við flogfarinum til Flesland, og skulu verða við okkum í 10 dagar.

Her hitta vit eisini  sjónvarpsmann,  sum arbeiðir hjá NRK, og hevur gjørt fleiri sjónvarpsendingar um oyggjarnar fyri vestan, m.a. hevur hann gjørt tvær sendingar úr Føroyum, sum verða sendar í SVF í heyst.

Í dag er tað, at regattain Tysness runt kemur inn til Wåge.  Vit hava lisið okkum til at uml. 40 bátar hava luttikið, men hetta hevur verið tá regattin var í hæddini. Ídag vóru bert 10 bátar (eitt sindur skuffandi) Byrja var á Aarbakke fríggjakvøld, síðan verður lagt inn í tveimum støðum og yvirnátta. Enda verður aftur í Aarbakke sunnudag seinrapart.

Í Wåge er gott at liggja.  Tá vit vóru her í 2006 hildu vit tað verða óinteresant, men her er mikið hugnaligt so vit verða liggjandi.  Ganga okkum ein túr niðan í fjøllini, ætla okkum upp á “Tysnes Såte”, sum er 674 m, men ov langt er ligið á dagin áðrenn vit fóru avstað, og ringt er at finna gøtuna gjøgnum skógin, so vit náa bert uml 400 m upp,  tá vit avgerða at venda,  Vit  koma tó niðanum trævøksturin og útsýni yvir Bjarnafjørðin er frálíkt.   Ein frálíkur túrur

Ætlanin er ídag at siglað suður til Oysero, men komin suðurum Røtinga, verður avgjørt at sigla suðurum Bjarnafjørðin.  Hetta er bert 2 fj longur enn at siglað vesturum og norð til Oysero.  Eisini er regattaðin “Tysness runt” í huganum.

Ætlað at sigla norðum Radoy og til Festo, men komin nakað norð, venda vit og farða suður til Litlebergen, har kom vit inn kl 07,  leggja okkum ein løtu, men kl 10,oo pikkar á dekki og maður spyr um vit kunnu flyta, tí báturin innanfyri okkum skal út.

Sigla av Bergen  við kós móti Manger á Radoy, haðani søgan sigur at Heini Havreki kom frá.  Her er steindett,  ikki eitt menniskja at síggja, eitt niðurlagt fiskavirki og  vánalig kaj, stór fjørða so vit eru um at koma føst í brúnna. Seinri koma tveir menn á brúnna eftir óruddi, spyrja teir um ikki betur pláss er í tveimum smáðum havnum norðanfyri og sunnanfyri.  Nei, tær eru privatur, vit kunnu liggja her.

Ganga ein túr gjøgnum bygdina, sum liggur lítlan km niðanfrá.  Fara ein túr í kirkjugarðin.  Hetta er triðja kirkjan á staðnum, síðan Havrekasa tíð, so her sæst ongin farvegur.

Liggja í Bergen, drívað tíðina.  Kl 18  mynstrað Torgunn og Sjúrður av, tey skulu flúgva heim úr Bergen. 

Úr Klokkavika verður loyst kl 11.oo við kós mót Strusshamn, har vit tær ferðir áður hava verið við gamla Havreka.  Á siglitúrinum koma vit eisini á gomlu rutuna hjá Norrønu.

Eftir einfrálíkan dag í Sagvaag, verður siglt norðureftir og enda í Klokkevig, har vit liggja fyri náttina.

Liggja í Sagvaag allan dagin – sól og gott veður,  22 hitastig.   Her fáa vit vitjan av Svein Jonssen, sum er væl føroyingar og hevur brævasamband við fleiri, biður okkum heilsa heim.

Umframt Svein, vóru eisini “havnafútahjúnini” blíð og høvdu pynta vindeygað við føroyskum flaggi.  Tey vóru pensionistar og hann tókst við at verða “knívmakari”. Vit vitjaðu verkstað hansara  

Kl 10.oo verður kós sett mót Haugesund, ætlað møguliga norð um “Sletten” í kvøld.

Kl 18.30 verður loyst aftur úr Haugesund, við kós mót Espevær, men komin nakað norð er regn og illslit, verður tí avgjørt at fara til Moster ístaðin, har vit koma kl 23.oo

Í Moster er “steindett”.  Ongin gestabrúgv, bátafelagshúsið stendur at detta niður v.m., so vit fáa okkum temunn og fara víðari til Sagavaag, har vit koma kl 01.oo eftir 50 fj sigling.

Sigla til slúsurnar í Straumsvika leggja til eina kaj, men verða koyrd burtur “Privat”.  Hóast slúsurnar hava verið eitt tíðandi bindilið, tá tær vóru bygdar upprunaliga, fyri uml 120 áðrum síðan, verða tær ikki nógv brúktar ídag, so vit fara ikki ígjøgnum, men seta kós út aftur av fjørðinum, og leggja til á oynni “Borgoy”

Her tekur Harald ímóti endanum.  Hann hevur siglt við Duritu Holm á hennara jørðumsigling, og kennir væl Tórstein Holm og Axel Skoubo.  Liggur her við báti sínum HR 37 “Line”.

Loysa um 11 tíðina og ætla at sigla til einar 20 fj til eina náttúruhavn, men broyta kós til Langhammern har vit leggja stilt at fiska okkum til døgverða.

Veðrið er serstaka gott og veiðan verður 5 fiskar, sum verða flaktir á dekkinum. So er døgverðin bjargaður. 

Seta síðan kós móti náturuhavnini, men har vísir seg at verða bygt, og venda tí við og kasta akker í “Kjølvika” sum er ein lítil vík vit sóðu á veg inn.

Loysa kl 13.oo við kós mót “Østhusvika”, steðga eina løtu, síggja ikki “Føroyska” normannin.  Tey  høvdu havt brúdleyp á hotellinum leygarkvøldið, so stongt var sunnudagin.

Sigla víðari til “Fister”  seta segl og sløkkja motorin.  Eftir 3 tímar við 3-6 míla ferð, koma vit fram men fara ikki inn, tíð vindurn liggur beint inná.   Sigla víðari til “Hjelpeland”  har maður á bryggjuni rópar “Komið inn, vit flyta longur fram”. 

Tá vísir tað seg, at verða klaksvíkingur sum búð hevur í Noreg síðan 1945.  Helgi Joensen, listamaður, sum arbeiðir við “tin”  Hann er prátingarsamur og bjáðar “Ankardram” á kajkantinum.  Hann liggur har við sínum “Fairline 45” við enskum vinfólkum umborð.    Tey grilla á kajkantinum, so vit bjóða teimum heimsins besta øl afturvið  “veðr” ´frá Føroya Bjór. Takk Takk.

Liggja í “Jørpeland” og gerða útferð niðan á “Prejkestolen” sum er forberg 604 m høgur yvir Lysefjorden.  Farið var við buss til Fjellshytta, haðan gingið var í 2 tímar niðaná.  Túrurin var sagdur at verða 3.8 km hvønn vegin. Eftir at hava notið útsýni eina løtu og etið ei bita, var gingið omanaftur og bussur tikn aftur í bátin. 

Um kvøldið vóru nýkókaðar rækjur etnar – keyptar frá báti á fjørðinum.

Kasta akker í “Fjelsholmen”  eitt lítil vík.  Grunt var, so róð var runt bátin við lítla Magnusi, fyri at kanna dýpið og avgjørt var at verða liggjandi.  Grillin var tendrað og ligjandi var fyri dagin.

Ætlanin var at far túr til “Prejkestiólen”, men tá veðrið ikki var nakað serligt, var hetta útsett og loyst kl 9.oo við kós mót Stavanger, har vit komu kl 11,oo. Avgjørt var at fara inn í Vaagen, har gjestabryggja er, men har mátti tungan haldast mitt í munninum, tá siglast skuldi inn millum stóru turistskipini ið har  lógu.

Seinri um dagin fingu vit vitjan av norðmanni, giftur við Jenny Hansen úr Hósvík, hann búði í Østhusvik á Rennesøy, har tey hævdu hotel virksemi, hann bað okkum koma at vitja um tilbar.

Á veg avstað aftur úr Stavanger, hittu vit eisini norðmann sum talaði á okkum – hann hevði sæð navni á bátinum – um ikki Argir varð ein forstaður til Havnina.  Hann hevði verið í Føroyum áður og búð á gamla Hotel Føroyum á Kongabrúnni.  Hann hevði hildi dimmu í nógv ár og nú las hann hana á netinum regluliga, fyri at frætta úr Føroyum.

Tá vit vaknaðu um morgunin var hetta stóra turistskipið komi inn, men mátti leggja longur úti, tí Havreki hevði fingið 1. Pláss.

Loysa kl 11  og siglað til “Tau”  har lagt verður inn í gestahavnina,  har er eisini rættuliga grunt, og takað botn við bryggjuna, men flyta so longur inn í hylin, har er betur og verða liggjandi.  Í “Tau” liggur aftur “Hav Streym” úr Runavík sum Fróði, guðssonurin er stýrimaður við,  teimum møttu vit eisini í Haugesund og Stavanger.

Í Tau var eitt fitt svanapar við 5 ungum, sum treivst væl hjá bátinum, tí tey fingu fitt av breyði at eta.

6, 5 fj sigling   200 kr havnagjald.

Sólin er ikki frammi ídag, men veðrið annars gott.  Sjúrður hevur verið úti og heinta krækling, so tað verður ein góð máltíð í kvøld.  Eftir at hava eti ein góðan bita av turrum tvøsti og spiki, verður akkeri tikið upp og kósin sett mótið “Alvestad”, har vit koma kl 17.

Hetta sær út til at verða eitt meira óinteresant pláss, so hugt verður aftur í kortið og semja er um at halda leiðina fram til “Judaberg” á Finnøy ístaðin. Tað eru 14 fj at sigla og tekur uml 2,5 tímar.

Komin til Judaberg, vísir tað seg at verða ringt at finna pláss, síggja skelti við “gæstepladser”, sigla inn í munnan á einum hyli, men har er alt ov grunt so skjótt verður bakkað.  Hyggja síðan inn í marinaina, men har er heldur einki pláss.  Avgjørt verður at leggja við eina træbryggju mitt í bygdini, beint undir innkeypshandlinum. Har verða vit liggjandi fyri náttina – eingin streymur, men heldur einki legugjald.

Loysa úr Haugesund við kós móti eini natúrhavn í kallast “Hamnerholmen”, har vit kasta akker  kl 17,30  Veðrið er av tí allarbesta – logn og sólin bakar niður, so grillin verður tendrað beinanvegin. Seinri verðu gingin ein túrður runt hólmin, sum er uml 400 x 200 m og onki fólk býr har.  Eisini liggja 3 norskir bátar í víkini

Sunnudagur  - liggja í Haugesund,  ganga ein túr gjøgnum býin, hugsaðu um vit sóðu nakað til “Amandu”, men tað var ikki. Tó sóðu vit eini hús í “Djúpaskar” sum høvdu kvist. Lesur man sangin, hevur sjómaðurin havt mangað heita løtu á kvistinum.

Avgjørt var at bíða við at fara víðari til eitt landniringsnos millum Noreg og Shetland var farið framvið.   Eftir at hava bunkrað 80 litrar,  var kl. 09.oo hósmorgunin  lagt frá landi aftur, við kós mótið Skudesneshavn.

Veðrið var av tí allarbesta, logn og sólskyn.  So tað sum manglaði á fyrra strekkinum var fingið aftur nú.

Kl 18.45 fór ein ógvisligur alarmur ígongd umborð – hvat nú ???    Tað vísti seg at verða eitt Distress kall frá VHF ´num, sum Rogaland radio svaraði.  Talan var um eld umborð á einum báti við seks fólkum umborð.  Tað spældi tó væl av. 

Sunnukvøldið var byrja uppá Noregstúrin.  Lagt var frá landið kl 21.oo,  í fylgi við “Ninu”,  siglt út um Borðuna og kós sett í Yell sundi.

Veðrið var gott at byrja við, men sum leið á náttina vaks vindurin nakað og og lækkaði í mun til veðurforsøgnina, so tað gjørdist  nakað óslætt og rættuliga sjóverksligt.

Út á mánadagin gjørdist frægari og tá komið var inn móti Shetlandi var gott veður.   Kl  06.oo týsmorgunin var, í dýrdarveðrið siglt suður gjøgnum sundi og lagt at í Lerwik kl 13.oo, har møttu vit “Mir” sum  tá loysti aftur á veg til Noregs

Fríggjadagin var farið til bátatreff í Hvalvík.  siglt var av Havnini fríggjakvøldið á Selatræ har einir 8-10 bátaar lógu.  Leygardagin var bátatreff hildið í góðum veðrið.   1/2 av manningini var við, meðan hin helvtin var heima og arbeiddi seg ajour, so farðast kann til Hetland og Noregs, so skjótt veðrið loyvir.

Tað vísir seg at vindmátarin er vorin í ólagið, og eftir at hava fingið tól og leiðingar mált út, var staðfest at breki er uppí í mastrini, so neyðugt var at fara til "væjrs".  Tá er gott at kenna ungar raskar menn

Eftir at maskinmeistarin hevur verið meir í Afrika, enn vænta var, er motorutin tó komin undir land nú, og verður settur í aftur Havreka ídag.